Blow, Northerne Wind
BY ANONYMOUS
Blow, northerne wynd,
Send thou me my suetyng!
Blow, northerne wynd,
Blou, blou, blou!
Ichot a burde in boure bryht,
That fully semly is on syht,
Menskful maiden of myht,
Feir ant fre to fonde;
In al this wurhliche won,
A burde of blod and of bon
Never yete y nuste non
Lussomore in londe.
With lokkes lefliche and longe,
With frount and face feir to fonge,
With murthes monie mote heo monge,
That brid so breme in boure;
With lossom eye, grete ant gode,
With browen blysfol under hode;
He that reste him on the rode
That leflich lyf honoure!
Hire lure lumes liht
Ase a launterne a nyht,
Hire bleo blykyeth so bryht:
So feyr heo is ant fyn!
A suetly suyre heo hath to holde,
With armes, shuldre, ase mon wolde,
Ant fyngres feyre forte folde,
God wolde hue were myn!
Middel heo hath menskful smal;
Hire loveliche chere as cristal;
Theyes, legges, fet, ant al,
Ywraht is of the beste.
A lussum ledy lasteles
That sweting is, and ever wes;
A betere burde never nes
Yheryed with the heste.
Heo is dereworthe in day,
Graciouse, stout, and gay,
Gentil, jolyf so the jay,
Worhliche when heo waketh.
Maiden murgest of mouth;
Bi est, bi west, by north and south,
Thér nis fithele ne crouth
That such murthes maketh.
Heo is coral of godnesse,
Heo is rubie of ryhtfulnesse,
Heo is cristal of clannesse,
Ant baner of bealté;
Heo is lilie of largesse,
Heo is paruenke of prouesse,
Heo is solsecle of suetnesse,
Ant ledy of lealté.
For hire love y carke ant care,
For hire love y droupne ant dare,
For hire love my blisse is bare,
Ant al ich waxe won;
For hire love in slep y slake,
For hire love al nyht ich wake,
For hire love mournynge y make
More then eny mon.
